အဲလ်ဘေးနီးယားကို ဂိုးပြတ် အနိုင်ယူပြီး ပုံစံကောင်းတစ်ခုကို ဆက်ထိန်းထားနိုင်ခဲ့တဲ့ အင်္ဂလန်

အဲလ်ဘေးနီးယား ၀ – ၂ အင်္ဂလန်

မနေ့ညက ယှဉ်ပြိုင်ကစားခဲ့တဲ့ ၂၀၂၂ ကမ္ဘာ့ဖလား ဥရောပဇုန် ခြေစစ်ပွဲ အုပ်စု အိုင် ပွဲစဉ်မှာတော့ အင်္ဂလန် တို့ အဲလ်ဘေးနီးယားကို အဝေးကွင်းမှာ ဟယ်ရီကိန်း မေဆင်မောင့်တို့ရဲ့ သွင်းဂိုးတွေနဲ့ ၂ ဂိုးပြတ် အနိုင်ရသွားခဲ့ပါတယ်။ ပထမပွဲတုန်းက ဆန်မာရီနိုကို ၅-၀ နဲ့ အနိုင်ရထားခဲ့တဲ့ အင်္ဂလန် တို့ ၂ ပွဲကစား ရမှတ် ၆ မှတ် ရဂိုး ၇ ဂိုး ပေးဂိုး မရှိနဲ့ ကမ္ဘာ့ဖလား ခြေစစ်ပွဲ ဥရောပဇုန် အုပ်စု(ဈ) ကို ဆက်လက် ဦးဆောင်နိုင်ခဲ့ပါတယ်။

အင်္ဂလန်တို့ ပထမပွဲ ဆန်မာရီနို ကို ဂိုးပြတ်အနိုင်ရခဲ့တုန်းက လူစားရင်းကို တော်တော်များများ အပြောင်းအလဲ ပြုလုပ်ခဲ့ပြီး တိုက်စစ်မှာ ဟယ်ရီကိန်း တစ်ဦးတည်းကို ဦးဆောင်စေခဲ့ပြီး နောက်မှာ စတာလင်၊ မေဆင်မောင့်၊ ဖိုဒန်၊ ကွင်းလယ်မှာ ဒီကလန်ရိုက်စ်နဲ့ ကယ်ဗင် ဖီးလစ် တို့ကို တွဲပေးကာ နောက်တန်းမှာ လုခ်ရှော၊ မက်ဂွိုင်းယား၊ ဂျွန်စတုန်းစ်၊ ဝေါလ်ကာ၊ ဂိုးမှာတော့ နစ်ခ်ပုပ်တို့ ပါဝင်လာပါတယ်။ အဲလ်ဘေးနီးယားမှာ‌တော့ စီးရီးအေ အခြေစိုက် ကစားသမား တချို့ ပါဝင်လာခဲ့ပြီး စပီဇီယာက အစ်ဇ်မာဂျီလီ၊ အတ္တလန်တာက ဂျင်မ်ဆီတီ၊ နာပိုလီ က ဟိုက်ဆက်ဂျ်တို့လို ကစားသမားတွေကို အသုံးပြုခဲ့ပါတယ်။ ဒီနေ့ပွဲမှာတော့ အင်္ဂလန်ရဲ့ ကစားပုံက အလောသိပ်မကြီးခဲ့ပဲ ပုံမှန်အတိုင်းပဲ အချိတ်အဆက် မိမိနဲ့ ဂိုးရဖို့ကို ဦးတည်ခဲ့တာ တွေ့ရပါတယ်။ ဒါ့ကြောင့် ပွဲချိန် ၃၈ မိနစ်မှာ လုခ်ရှောရဲ့ ဂိုးဧရိယာထဲ ဖြတ်တင်ပေးပို့တဲ့ ဘောလုံးကို ဟယ်ရီကိန်းက အဲလ်ဘေးနီးယား နောက်ခံလူတွေကြားကနေ အမိအရ ခေါင်းတိုက်ပြီး ဦးဆောင်ဂိုး သွင်းယူပေးခဲ့ပါတယ်။ အဲ့နောက်မှာတော့ အင်္ဂလန်တို့ပဲ ပွဲကို ဆက်လက် လွှမ်းမိုး ကစားနေခဲ့ပြီး ဒုတိယပိုင်း ၆၃ မိနစ်မှာတော့ ဟယ်ရီကိန်းရဲ့ အကွက်မြင်မြင်ထိုးပေးတဲ့ ဘောလုံးကို မေဆင်မောင့်ကို ဂိုးသမားကို ကျော်ဖြတ်သွင်းယူသွားခဲ့လို့ အင်္ဂလန် တို့နောက်ထပ် သွင်းဂိုး ၁ ဂိုး ထပ်မံရရှိခဲ့ပါတယ်။ လက်ကျန် မိနစ်တွေမှာတော့ အင်္ဂလန် ဘက်က ကယ်ဗင်ဖီးလစ်အစား ဝက်ဒ်ပရောက်စ်၊ ဖိုဒန်အစား ဂျက်ဆီ လင်ဂတ်တို့ ဝင်လာခဲ့ပြီး ပွဲကို ထိန်းကစားသွားခဲ့လို့ ၀-၂ ဆိုတဲ့ ရလဒ်နဲ့ အင်္ဂလန်တို့ နိုင်ပွဲဆက်ခဲ့ပါတယ်။