အင်တာမီလန် ၂-၁ လာဇီယ
စီးရီးအေ အမှတ်ပေးဇယားကို ဦးဆောင်နေတဲ့ အင်တာမီလန် ကတော့ လာဇီယိုကို အိမ်ကွင်းမှာ ခံစစ်မှူးတွေရဲ့ သွင်းဂိုးတွေနဲ့ အနိုင်ယူပြီး နိုင်ပွဲ ဆက်ခဲ့ပြန်ပါတယ်။
စီးရီးအေ ၁၂ ပွဲဆက် ရှုံးပွဲ မရှိသေးတဲ့ လက်ရှိ ချန်ပီယံ အင်တာတို့ နောက်ဆုံး ၈ ပွဲဆက် အနိုင်ရလဒ်နဲ့ အတူ အမှတ်ပေးဇယား ဒုတိယ နေရာက အေစီမီလန် ထက် တစ်ပွဲ လျော့ကစားပြီး ၁ မှတ် အသာနဲ့ ဆက်လက် ဦးဆောင်နိုင်ခဲ့တာ ဖြစ်ပါတယ်။
ပွဲစဉ်အကျဉ်း
ကိုဗစ် ၁၉ ကြောင့် ဘိုလော့ဂ်နာနဲ့ ပွဲမကစားခဲ့ရတဲ့ အင်တာမီလန်တို့ ကစားသမားတွေ အနားရနေမှုနဲ့ အတူ ဒီနေ့ပွဲ မှာတော့ လူစာရင်း အပြည့် အားအင် အပြည့်နဲ့ လာဇီယိုကို ရင်ဆိုင်သွားခဲ့တာ ဖြစ်ပါတယ်။ အက္ကာဘီက လွဲလို့ လူစုံနေခဲ့တဲ့ လာဇီယို ကလည်း အင်တာမီလန် ဆီက အနိမ့်ဆုံး သရေ ၁ မှတ်ယူနိုင်ဖို့ အာရုံစိုက်လာခဲ့ပေမယ့် ဆာရီရဲ့ နည်းဗျူဟာက ဒီပွဲမှာ ထင်သလောက် အလုပ်မဖြစ်ခဲ့တာ တွေ့ရပါတယ်။
ပြီးခဲ့တဲ့ ပွဲတွေတုန်းကလောက် မလွယ်ကူခဲ့ပေမယ့် ဆိုင်မွန် အင်ဇာဂီရဲ့ အသင်းဟာ ချန်ပီယံ ခြေစွမ်း အပြည့် ရှိနေတယ် ဆိုတာ သက်သေပြသွားခဲ့ပြီး ပြိုင်ဘက်ကို ပွဲချိန်ပြည့် လွှမ်းမိုး ကစားသွားနိုင်ခဲ့ပါတယ်။ ပွဲအစ ၁၇ မိနစ်မှာ ထဲက အင်တာတို့ လော်တာရို မာတီနက်ဇ်ကြောင့် ဦးဆောင်ဂိုး ရခဲ့ပေမယ့် VAR က လူကျွံဘော အဖြစ်ပဲ သတ်မှတ်ပေးခဲ့လို့ အိမ်ရှင်တို့ နစ်နာခဲ့ရပါတယ်။ ဒါပေမယ့်လည်း မိနစ် ၃၀ မှာ အလက်ဆန်ဒရို ဘက်စတိုနီက ဦးဆောင်ဂိုး ရယူပေးခဲ့ပါတယ်။ အဲ့နောက် တန်ပြန်တိုက်စစ်နဲ့ ကစားနေတဲ့ လာဇီယိုတို့ ၅ မိနစ် အကြာမှာ ချေပဂိုး ပြန်ရခဲ့ပြီး အင်မိုဘီလီက ကတ်တဲလ်ဒီရဲ့ ဖန်တီးပေးမှုကို အဆုံးသတ် သွင်းယူခဲ့တာ ဖြစ်ပါတယ်။
ဒုတိယပိုင်းမှာ ခြေစွမ်း ပိုတည်ငြိမ်လာပြီး ကစားအား ပိုကောင်းလာတဲ့ အင်တာတို့ လာဇီယို ဘက်ကို တရစပ် တိုက်စစ် ဆင်နိုင်ခဲ့ပြီး အရေးပါတဲ့ ခြိမ်းခြောက်မှုတွေ ပြုလုပ်နိုင်ခဲ့ပါတယ်။ ဒါ့အပြင် ၆၇ မိနစ်မှာ နောက်ထပ် ခံစစ်မှူး တစ်ဦး ဖြစ်တဲ့ မီလန် ရှက်ခရီနီယာက အားပါတဲ့ ခေါင်းတိုက်ချက်နဲ့ အင်တာ အတွက် အနိုင် ၃ မှတ် ရစေမယ့်ဂိုးကို သွင်းယူပေးခဲ့လို့ ပွဲအပြီးမှာ အိမ်ရှင်တို့ ၂-၁ ရလဒ်နဲ့ အနိုင်ရသွားခဲ့တာ ဖြစ်ပါတယ်။
ပွဲပြီးသုံးသပ်ချက်
ဒီနေ့ပွဲမှာ အဆုံးသတ် သေချာပြီး တစ်ဦးချင်း စွမ်းဆောင်ရည် ပိုကောင်းတဲ့ အသင်းက အနိုင်ရသွားခဲ့တယ်လို့ပဲ ဆိုရပါမယ်။ ခြေစွမ်းပိုင်းအရ ပြီးပြည့်စုံခြင်း မရှိချိန်မှာတောင် လိုအပ်နေတဲ့ အနိုင် ၃ မှတ်ကို ရအောင် ယူနိုင်နေဆဲ အင်တာရဲ့ Rhythm မှန်မှု ကိုတော့ ချီးကျူးရမှာ ဖြစ်ပါတယ်။ အဆင့် ၂ နေရာက အေစီမီလန်နဲ့ ၁ မှတ်သာ ကွာဟနေပေမယ့် ပွဲလျော့ ကစားထားလို့ စိတ်ပူစရာတော့ မရှိပါဘူး။
ဆာရီရဲ့ အသင်းဟာ ကစားသမားကောင်းတွေ ရှိပြီး တောင့်တင်းပေမယ့် အဆုံးသတ်ပိုင်းမှာ အားနည်းချက် ရှိခဲ့လို့ စီးရီးအေ ၂ ပွဲဆက် နိုင်ပွဲ ပျောက်ဆုံးမှုနဲ့ အတူ အဆင့် ၆ နေရာ လောက် အထိ တက်လှမ်းနိုင်မယ့် အခွင့်အရေးပါ ဆုံးရှုံးသွားခဲ့ရတာ ဖြစ်ပါတယ်။
လာမယ့်ပွဲစဉ်များ
အင်တာတို့ ကြားရက်မှာ ဂျူဗင်တပ်စ်နဲ့ အီတလီ စူပါဖလား ကစားရဖို့ ရှိနေပြီး လာဇီယို ကတော့ ဇန်နဝါရီလ ၁၅ ရက်နေ့မှ ဆယ်လာနီတာနာနဲ့ စီးရီးအေ ပွဲစဉ် ၂၂ ကစားရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
