အနာဂတ်နဲ့ ပတ်သက်ပြီး ဖွင့်ဟလာတဲ့ မော်ရင်ဟို၊ အသင်းကြီးတွေ ဆီက စိတ်ဝင်စားမှုကို ရရှိထားကြောင်း နာပိုလီ ကြယ်ပွင့်ရဲ့ အေးဂျင့်ပြော (စီးရီးအေ နောက်ဆုံးရ သတင်းများ)

အနာဂတ်နဲ့ ပတ်သက်ပြီး ဖွင့်ဟလာတဲ့ မော်ရင်ဟို၊ အသင်းကြီးတွေ ဆီက စိတ်ဝင်စားမှုကို ရရှိထားကြောင်း နာပိုလီ ကြယ်ပွင့်ရဲ့ အေးဂျင့်ပြော စတဲ့ သတင်းတွေ အပါအဝင် ဖေဖော်ဝါရီလ ၁၇ ရက်နေ့ရဲ့ စီးရီးအေ သတင်း တချို့ကို ဖော်ပြပေးသွားမှာ ဖြစ်ပါတယ်။

အသင်းကြီးတွေ ဆီက စိတ်ဝင်စားမှုကို ရရှိထားကြောင်း နာပိုလီ ကြယ်ပွင့်ရဲ့ အေးဂျင့်ပြော

နာပိုလီ ကြယ်ပွင့် ခါဗီချာ ခါဗာရက်ခီလီရာရဲ့ အေးဂျင့် ဖြစ်သူက သူ့ကစားသမားကို ထိပ်တန်း အသင်းကြီးတွေက စိတ်ဝင်စားနေကြောင်း ဖွင့်ဟပြောကြားခဲ့ပါတယ်။

အဆိုပါ တောင်ပံ ကစားသမားဟာ ဒီရာသီမှာ သူ့အတွက် ပထမဆုံး စီးရီးအေ ရာသီ အဖြစ် ဖြတ်သန်းနေသည့်တိုင် အသင်း အတွက် ပြည်တွင်းမှာရော၊ ဥရောပ ချန်ပီယံလိဂ် မှာပါ ပုံစံကောင်းတွေ ပြသနေပါတယ်။ အချိန်တို အတွင်းမှာ နာမည်ရလာတဲ့ ဒီကစားသမားကို ဥရောပ ထိပ်တန်း အသင်းကြီးတွေက စောင့်ကြည့်နေကြောင်းလည်း သတင်းတွေက ဖော်ပြနေပါတယ်။

ကစားသမားရဲ့ အေးဂျင့် မာမူကာဂျူဂီလီ ကလည်း ထိပ်တန်း အသင်းတွေရဲ့ စိတ်ဝင်စားမှု အများအပြားကို ရရှိထားကြောင်း၊ ဒါကို ကျွန်တော်နဲ့ သူ့အဖေသာ သိရှိထားကြောင်း၊ လက်ရှိအချိန် မှာတော့ ခါဗာရာက နာပိုလီနဲ့ အတူ စကူဒက်တိုဖလား ရဖို့နဲ့ ချန်ပီယံလိဂ် ပွဲတွေ ကိုသာ အာရုံစိုက်ထားကြောင်း ပြောကြားခဲ့ပါတယ်။

အနာဂတ်နဲ့ ပတ်သက်ပြီး ဖွင့်ဟလာတဲ့ မော်ရင်ဟို

ရိုးမား နည်းပြ ဟိုဆေး မော်ရင်ဟိုက အနာဂတ်နဲ့ ပတ်သက်ပြီး ဘာကိုမှ မမျှော်လင့်ထားကြောင်း ဖွင့်ဟ ပြောကြားသွားခဲ့ပါတယ်။

မော်ရင်ဟိုဟာ စီးရီးအေ ကလပ်နဲ့ (၂၀၂၄) ခုနှစ် အထိ စာချုပ် သက်တမ်းရှိနေတဲ့ နည်းပြ တစ်ယောက် ဖြစ်ပြီး ပြီးခဲ့တဲ့ ဒီဇင်ဘာမှာလည်း အသင်းက ထွက်ခွာဖို့ စဥ်းစားခဲ့ဖူးကြောင်း ဖွင့်ဟထားပါတယ်။ ဒါ့အပြင် သူ့ရဲ့အနာဂတ်က ဒီနောက်ပိုင်းမှာ မတည်မငြိမ် ဖြစ်နေပြီး အသင်းဟောင်း ချဲလ်ဆီးကို ပြန်ဖို့ မော်ရင်ဟို ဆန္ဒရှိနေကြောင်းလည်း သတင်းတွေက ဖော်ပြနေပါတယ်။

မော်ရင်ဟို ကလည်း အခုမှ ဖေဖော်ဝါရီလလယ်ပဲ ရှိသေးကြောင်း၊ အသင်းက ကျွန်တော့်ကို ဇွန်မှာ စာချုပ်ကိစ္စ စကားပြောမယ်လို့ ခင်ဗျားတို့ ထင်နေတာ ဖြစ်ကြောင်း၊ အဲ့ဒီအချိန် ဆိုရင် နောက်ကျသွားနိုင်ကြောင်း၊ ဘာကိုမှ မမျှော်လင့်ထားကြောင်းနဲ့ အသင်း တာဝန်ရှိသူတွေ အနေနဲ့ ကျွန်တော့် ဆီက ဘာမျှော်လင့်လို့ ရလဲ ဆိုတာကို သိထားကြောင်း ဖွင့်ဟ ပြောကြားခဲ့ပါတယ်။

စီးရီးအေ